ڈپٹی کمشنر کیچ یاسر اقبال دشتی نے اعلان کیا ہے کہ ایران کے ساتھ کامیاب مذاکرات کے بعد ضلع کیچ میں واقع جلاگی بارڈر کراسنگ پوائنٹ جولائی سے باضابطہ طور پر دوبارہ کھول دیا جائے گا، جس کے بعد سرحدی تجارت بحال ہو جائے گی۔ انہوں نے ہنگامی پریس کانفرنس میں بتایا کہ باقاعدہ تجارتی سرگرمیوں کے آغاز سے قبل تکنیکی انتظامات کو حتمی شکل دی جا رہی ہے۔
ڈپٹی کمشنر کے مطابق یہ پیش رفت آئی جی ایف سی بلوچستان (ساؤتھ) میجر جنرل بلال سرفراز کی قیادت میں کی جانے والی مربوط کوششوں کا نتیجہ ہے۔ انہوں نے کہا کہ گزشتہ ڈیڑھ سال سے سرحدی گزرگاہ بند ہونے کے باعث مقامی معیشت شدید متاثر ہوئی، جبکہ جلاگی بارڈر کی بحالی سے تجارت، روزگار اور معاشی سرگرمیوں کو فروغ ملے گا۔ حکام نے تاجروں اور سرحدی نمائندوں کی مشاورت سے شفاف اور مؤثر تجارتی نظام قائم کرنے کا بھی اعلان کیا ہے۔