ضلعی انتظامیہ نے وفاقی دارالحکومت میں شادی ہالز اور مارکیز میں ون ڈش پالیسی پر سختی سے عملدرآمد کا فیصلہ کرتے ہوئے خلاف ورزی کرنے والوں کے خلاف سخت قانونی کارروائی کا اعلان کر دیا ہے۔
ڈپٹی کمشنر اسلام آباد عرفان نواز میمن کے دفتر سے جاری ہدایات کے مطابق ون ڈش پالیسی کی خلاف ورزی کرنے والوں کے خلاف مقدمات درج کیے جائیں گے اور پولیس کو گرفتاریوں کی ہدایت بھی دی گئی ہے۔
احکامات کے تحت اگر کسی شادی ہال یا مارکی میں دوسری مرتبہ خلاف ورزی پائی گئی تو نہ صرف مالکان کو گرفتار کیا جائے گا بلکہ متعلقہ مقام کو سیل بھی کر دیا جائے گا۔
انتظامیہ نے مزید واضح کیا ہے کہ سیل شدہ عمارتوں میں تقریبات منعقد کرنے کی صورت میں بھاری جرمانے عائد کیے جائیں گے اور اضافی قانونی کارروائی بھی کی جائے گی۔
ڈپٹی کمشنر نے تمام اسسٹنٹ کمشنرز کو ہدایت دی ہے کہ وہ روزانہ کی بنیاد پر مارکیز اور شادی ہالز کی نگرانی کریں اور کسی بھی خلاف ورزی پر بلا امتیاز کارروائی عمل میں لائیں۔
پولیس کو بھی ہدایت کی گئی ہے کہ وہ انتظامیہ کے ساتھ مکمل تعاون کرتے ہوئے خلاف ورزی پر مقدمات کا اندراج اور ذمہ دار افراد کی گرفتاری یقینی بنائے۔
یہ اقدام اسلام آباد میں شادی تقریبات کے اخراجات اور قواعد و ضوابط پر کنٹرول کے لیے حکومتی پالیسی کے سخت نفاذ کی جانب اہم پیش رفت قرار دیا جا رہا ہے۔