پشاور، 15 اپریل (ویب ڈیسک): نیشنل ورکشاپ بلوچستان کے 92 رکنی وفد نے پشاور کا اہم دورہ کیا، جس میں مختلف شعبہ ہائے زندگی سے تعلق رکھنے والے مرد و خواتین شامل تھے۔
تفصیلات کے مطابق دورے کے دوران وفد کو خیبر پختونخوا کی مجموعی سیکیورٹی صورتحال، انسداد دہشت گردی اقدامات اور بارڈر مینجمنٹ کے حوالے سے تفصیلی بریفنگ دی گئی۔
وفد نے کور کمانڈر پشاور سے بھی ملاقات کی جس میں قومی اور علاقائی سیکیورٹی امور پر تبادلہ خیال کیا گیا۔ اس موقع پر کور کمانڈر نے وفد کو دہشت گردی کے خلاف سیکیورٹی فورسز کی کارروائیوں سے آگاہ کیا۔
وفد نے گورنر ہاؤس پشاور اور بالا حصار فورٹ میوزیم کا بھی دورہ کیا جبکہ شہداء کی یادگار پر حاضری دے کر خراج عقیدت پیش کیا۔
شرکاء نے اپنے تاثرات میں کہا کہ پاک فوج اور فرنٹیئر کور خیبر پختونخوا نہ صرف ملک کے دفاع میں اہم کردار ادا کر رہی ہیں بلکہ تعلیم، صحت اور کھیلوں کے فروغ میں بھی نمایاں خدمات انجام دے رہی ہیں۔
انہوں نے مزید کہا کہ خیبر پختونخوا کی سیکیورٹی اور ترقی سے متعلق زمینی حقائق ان کی توقعات سے زیادہ مثبت ہیں۔