پاکستان اور کرغزستان کا سالانہ باہمی تجارت 200 ملین ڈالر تک بڑھانے کا ہدف، 15 دوطرفہ دستاویزات پر دستخط

پاکستان نے کرغزستان کو اپنے تجارتی اور مواصلاتی راستوں کے ساتھ کراچی اور گوادر کی بندرگاہوں تک رسائی کے وسیع مواقع فراہم کرنے کی پیشکش کردی ہے۔ وزیراعظم شہباز شریف نے بشکیک میں کرغزستان کے صدر صدر جپاروف سے مذاکرات کے دوران کہا کہ پاکستان دونوں ممالک کے درمیان جامع تعاون مضبوط بنانے اور طے پانے والے معاہدوں پر مؤثر عملدرآمد کے لیے تیار ہے۔ وزیراعظم نے کہا کہ دونوں ممالک کے درمیان متحرک سیاسی روابط مستقبل میں تجارتی اور اقتصادی تعلقات کے فروغ کے لیے مضبوط بنیاد فراہم کررہے ہیں۔ انہوں نے آنے والے برسوں میں پاکستان اور کرغزستان کے درمیان سالانہ باہمی تجارت کا حجم 200 ملین ڈالر تک بڑھانے کا ہدف بھی مقرر کیا۔ مذاکرات کے دوران وزیراعظم نے کرغزستان کی قیادت اور عوام کو ملک کی 35ویں یوم آزادی، شنگھائی تعاون تنظیم کے سربراہ اجلاس کی کامیاب میزبانی اور چھٹی عالمی خانہ بدوش کھیلوں کے انعقاد پر مبارک باد دی۔ ملاقات کے اختتام پر دونوں رہنماؤں نے پاکستان اور کرغزستان کے درمیان دوستی، باہمی اعتماد اور مفاہمت کی بلند سطح پر اطمینان کا اظہار کیا۔ دونوں ممالک نے سیاسی، تجارتی و اقتصادی، قانون نافذ کرنے والے اداروں، تعلیم، سائنسی و تکنیکی اور انسانی شعبوں سے متعلق 15 دوطرفہ دستاویزات پر دستخط اور تبادلہ کیا۔ رہنماؤں نے امید ظاہر کی کہ یہ معاہدے دونوں ممالک کے درمیان نئے منصوبوں اور مشترکہ اقدامات کی راہ ہموار کریں گے۔