گوادر نارتھ فری زون میں کام کرنے والی چینی کمپنی ہینگینگ نے ۵ اکتوبر کو گدھے کا ۸۱ ٹن گوشت، ہڈیاں اور کھالیں تین کھیپوں میں چین برآمد کر دیں۔ گوادر پرو کے مطابق ہر کھیپ کا خالص وزن ۲۷ ٹن تھا اور تمام کھیپیں کسٹم کلیئرنس، برآمدی ضوابط اور مقررہ طریقۂ کار مکمل کرنے کے بعد روانہ کی گئیں۔
کمپنی کے ایک عہدیدار کے مطابق گدھے کا تمام گوشت منجمد حالت میں بحری جہازوں کے ذریعے چین بھیجا گیا۔ طے شدہ ضوابط کے تحت گوادر فری زون میں قائم یہ تنصیب سخت نگرانی میں کام کرتی ہے، جہاں ضمنی مصنوعات کی مقامی پاکستانی منڈی میں فروخت کی اجازت نہیں، جبکہ انہیں صرف فضائی یا بحری راستے سے باہر بھیجنے کی پالیسی نافذ ہے۔
پاکستان میں گدھے کے گوشت اور کھالوں کی پراسیسنگ کے لیے جدید مذبح خانہ گزشتہ سال تقریباً پانچ کروڑ ڈالر کی لاگت سے مکمل کیا گیا تھا۔ اس منصوبے کا مقصد چین میں گدھے کے گوشت اور کھالوں کی طلب پوری کرنے کے لیے برآمدات کو فروغ دینا ہے۔
چین میں گدھے کی کھال سے روایتی چینی ادویاتی مصنوعات، خصوصاً ای جیاو، تیار کی جاتی ہیں، جس کے لیے کھال اہم خام مال ہے۔ پاکستان میں تقریباً ۵۸ لاکھ گدھے موجود ہیں اور ملک گدھوں کی تعداد کے لحاظ سے دنیا میں تیسرے نمبر پر ہے۔