گورنر بلوچستان جعفر خان مندوخیل نے اعلان کیا ہے کہ جلد کوئٹہ میں ماحولیاتی تبدیلی اور مصنوعی ذہانت (AI) پر بین الاقوامی کانفرنس منعقد کی جائے گی، جس میں عالمی ماہرین، سائنسدان اور اقوام متحدہ کے نمائندے شرکت کریں گے۔
کوئٹہ میں گورنر ہاؤس میں BUITEMS کے وائس چانسلر پروفیسر ڈاکٹر خالد حفیظ سے ملاقات کے دوران گفتگو کرتے ہوئے گورنر نے کہا کہ بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز اس سطح کی عالمی کانفرنس کی میزبانی کی مکمل صلاحیت رکھتی ہے۔ انہوں نے کہا کہ یہ کانفرنس عالمی سطح پر تحقیق، ماحولیاتی تحفظ اور ٹیکنالوجی میں تعاون کے نئے دروازے کھولے گی۔
جعفر خان مندوخیل نے کہا کہ مجوزہ کانفرنس اقوام متحدہ کے “Decade on Ecosystem Restoration 2021–2030” سے منسلک ہوگی، جس کا مقصد ماحولیاتی نظام کی بحالی، تحقیق اور جدید حلوں کے ذریعے عالمی چیلنجز سے نمٹنا ہے۔ انہوں نے کہا کہ ماحولیاتی تبدیلی صرف ماحولیاتی مسئلہ نہیں بلکہ انسانی بقا کے لیے ایک سنگین خطرہ ہے۔
انہوں نے کہا کہ پاکستان میں تعلیم یافتہ افراد کی تعداد میں اضافہ ہو رہا ہے لیکن روزگار کے مواقع اسی رفتار سے نہیں بڑھ رہے، جو ایک بڑا چیلنج ہے۔ اس مسئلے کے حل کے لیے پبلک پرائیویٹ پارٹنرشپ، انٹرپرینیورشپ اور مارکیٹ پر مبنی پالیسیوں کی ضرورت ہے تاکہ نوجوانوں کے لیے روزگار کے نئے مواقع پیدا کیے جا سکیں۔
گورنر نے کہا کہ BUITEMS جیسے ادارے تحقیق اور جدید تعلیم کے ذریعے عالمی معیار کے تقاضوں سے ہم آہنگ ہو کر ملک کی ترقی میں اہم کردار ادا کر سکتے ہیں۔