غیر معیاری اور مضر صحت اشیا کے خلاف کریک ڈاؤن، 50 سے زائد کاروباروں کو بہتری کے نوٹس

بلوچستان فوڈ اتھارٹی نے صوبے بھر میں خوراک کے معیار اور حفظان صحت کے اصولوں پر عملدرآمد یقینی بنانے کے لیے جاری کارروائیوں کے دوران 45 کاروباری مراکز پر جرمانے عائد جبکہ 50 سے زائد دیگر کو بہتری کے نوٹس جاری کر دیے۔ فوڈ اتھارٹی کی ٹیموں نے کوئٹہ، تربت، اوستہ محمد، مسلم باغ، خضدار اور حب میں بیکریوں، ریسٹورنٹس، جنرل اسٹورز، مٹھائی کی دکانوں، گوشت اور دودھ کے مراکز، مصالحہ یونٹس اور نان شاپس کا معائنہ کیا۔ کوئٹہ میں بعض مقامات پر خراب گوشت، کیڑے مکوڑوں کی موجودگی، غیر hygienic کچن، زنگ آلود برتن، ناقص آلات کی دیکھ بھال اور خوراک کو غیر مناسب طریقے سے ذخیرہ کرنے سمیت متعدد خلاف ورزیاں سامنے آئیں۔ حکام نے ایک آر او واٹر پلانٹ کے خلاف بھی کارروائی کی، جس پر غیر رجسٹرڈ برانڈ کے نام سے بوتل بند پانی فروخت کرنے کا الزام تھا۔ دیگر اضلاع میں معائنے کے دوران زائد المیعاد اشیا، ناقص صفائی، غیر مناسب اسٹوریج، غیر مجاز فوڈ کلرز کے استعمال اور مبینہ طور پر دودھ میں ملاوٹ سمیت مختلف خلاف ورزیاں بھی سامنے آئیں۔ بلوچستان فوڈ اتھارٹی کے حکام نے واضح کیا ہے کہ غیر معیاری اور مضر صحت خوراک کی روک تھام کے لیے صوبے بھر میں کارروائیاں مزید جاری رہیں گی اور فوڈ سیفٹی قوانین کی خلاف ورزی کرنے والوں کے خلاف سخت اقدامات کیے جائیں گے۔