وزیراعلیٰ بلوچستان سرفراز بگٹی نے کہا ہے کہ آئندہ مالی سال 2026–27 کا صوبائی بجٹ عوامی توقعات، ترقیاتی ضروریات اور صوبے کے مستقبل کے تقاضوں کو مدنظر رکھتے ہوئے تیار کیا جا رہا ہے۔
تفصیلات کے مطابق یہ بات انہوں نے وزیراعلیٰ سیکرٹریٹ میں اتحادی جماعتوں کے پارلیمانی رہنماؤں سے ملاقات کے دوران کہی، جہاں آئندہ بجٹ کی تیاری، ترقیاتی ترجیحات، فلاحی منصوبوں اور صوبے کی مجموعی سیاسی صورتحال پر مشاورت کی گئی۔
اجلاس میں شرکاء نے عوامی فلاح و بہبود سے متعلق اہم امور اور ترقیاتی منصوبوں کا تفصیلی جائزہ لیا اور آئندہ مالی منصوبہ بندی میں ان کو شامل کرنے پر غور کیا گیا۔ حکومتی اتحاد نے اس بات پر اتفاق کیا کہ بجٹ کی تیاری میں عوامی ضروریات کو بنیادی حیثیت دی جائے گی۔
وزیراعلیٰ نے کہا کہ حکومت کی کوشش ہے کہ وسائل کو مؤثر انداز میں استعمال کرتے ہوئے ایسے منصوبے شامل کیے جائیں جو عوام کو براہ راست ریلیف فراہم کریں اور صوبے میں پائیدار ترقی کو فروغ دیں۔ انہوں نے کہا کہ ترقیاتی عمل میں شفافیت اور بروقت تکمیل حکومت کی اولین ترجیح ہے۔
اجلاس میں اس بات پر بھی زور دیا گیا کہ آئندہ بجٹ کو عوامی توقعات کے مطابق عملی اور متوازن بنایا جائے تاکہ صوبے کی سماجی و معاشی بہتری ممکن ہو سکے۔