گوادر: بلوچستان حکومت نے نوجوانوں کو تکنیکی تعلیم کے ذریعے بااختیار بنانے کے اقدامات تیز کر دیے ہیں۔
کھیل اور امورِ نوجوانان کی مشیر مینا مجید نے پاک چین ٹیکنیکل اینڈ ووکیشنل انسٹیٹیوٹ گوادر کا دورہ کیا اور ادارے کی کارکردگی کا تفصیلی جائزہ لیا۔
گوادر پورٹ اتھارٹی کے چیئرمین نورالحق بلوچ بھی اس موقع پر ان کے ہمراہ تھے۔
مشیر کو ادارے میں جاری جدید تربیتی سہولیات، تکنیکی پروگرامز اور آن لائن کورسز کے بارے میں بریفنگ دی گئی۔ انہوں نے کلاس رومز، پورٹ سے متعلق تربیتی ماڈیولز اور طلبہ کی سرگرمیوں کا معائنہ کیا اور ادارے کے ماحول کو قابلِ تعریف قرار دیا۔
انہوں نے ہاسٹل اور لائبریری کا بھی دورہ کیا اور تعلیمی ماحول کو مثالی قرار دیا۔
مینا مجید نے خواتین کی شمولیت کو سراہتے ہوئے ڈرائیونگ کلاسز میں زیر تربیت خواتین سے ملاقات کی اور انہیں مختلف تکنیکی شعبوں میں آگے بڑھنے کی ترغیب دی۔
انہوں نے کہا کہ تکنیکی تعلیم معاشی خود کفالت کے لیے انتہائی ضروری ہے اور ایسے ادارے روزگار کے مواقع پیدا کرنے اور صوبے کی ترقی میں اہم کردار ادا کر رہے ہیں۔