وزیراعظم شہباز شریف کا پاکستان اور اٹلی کے تعلقات مزید مضبوط بنانے کے لیے مکمل تعاون کی یقین دہانی

وزیراعظم محمد شہباز شریف نے پاکستان اور اٹلی کے دوطرفہ تعلقات مزید مضبوط بنانے کے لیے مکمل تعاون کی یقین دہانی کرائی ہے۔ وزیراعظم نے یہ یقین دہانی پاکستان میں اٹلی کے نو تعینات سفیر اوگو چیلا تانی سے وزیراعظم ہاؤس میں ملاقات کے دوران کرائی۔ وزیراعظم نے کہا کہ پاکستان اور اٹلی کے درمیان بہترین دوطرفہ تعلقات قائم ہیں اور دونوں ممالک باہمی دلچسپی کے شعبوں میں تعاون کو مزید وسعت دے سکتے ہیں۔ انہوں نے زراعت، اطلاعاتی ٹیکنالوجی، مصنوعی ذہانت، صنعت، ٹیکسٹائل اور عوامی روابط کے شعبوں میں تعاون بڑھانے پر زور دیا۔ وزیراعظم نے اطالوی وزیراعظم جارجیا میلونی کے لیے نیک خواہشات کا اظہار کیا اور ان سے اپنی سابقہ ملاقاتوں کو بھی یاد کیا۔ اطالوی سفیر نے وزیراعظم کا شکریہ ادا کرتے ہوئے اپنے دور سفارت کے دوران پاکستان اور اٹلی کے تعلقات کو مزید فروغ دینے اور مستحکم کرنے کے عزم کا اظہار کیا۔ انہوں نے باہمی دلچسپی کے تمام شعبوں میں پاکستانی حکومت کے ساتھ قریبی تعاون کی یقین دہانی بھی کرائی۔ ملاقات میں نائب وزیراعظم و وزیر خارجہ سینیٹر محمد اسحاق ڈار، وزیراعظم کے معاون خصوصی سید طارق فاطمی اور سیکریٹری خارجہ آمنہ بلوچ بھی شریک تھیں۔ دوسری جانب اسحاق ڈار نے اشیائے ضروریہ کی مناسب قیمتوں، غذائی تحفظ اور منڈی کے استحکام کے لیے مؤثر اقدامات اور مسلسل نگرانی کی ضرورت پر زور دیا