وزیراعلیٰ بلوچستان سرفراز بگٹی نے بلوچستان ٹیکنیکل ایجوکیشن اینڈ ووکیشنل ٹریننگ اتھارٹی (بی ٹیوٹا) کو جدید خطوط پر استوار کرنے کے لیے وسیع اصلاحات کا اعلان کرتے ہوئے کہا ہے کہ صوبے میں نوجوانوں کو روزگار کے بہتر مواقع فراہم کرنے کے لیے تکنیکی تعلیم اور ہنر مندی کو ترجیح دی جائے گی۔
انہوں نے یہ بات بی ٹیوٹا کے دسویں بورڈ اجلاس کی صدارت کرتے ہوئے کہی، جس میں ادارے کی کارکردگی، مالی نظم و ضبط اور اصلاحاتی اقدامات کا تفصیلی جائزہ لیا گیا۔ اجلاس میں ایڈوائزر برائے محنت و افرادی قوت سردار غلام رسول عمرانی، چیف سیکرٹری بلوچستان اور دیگر اعلیٰ حکام نے شرکت کی۔
وزیراعلیٰ نے کہا کہ ہر نوجوان کو سرکاری نوکری فراہم کرنا ممکن نہیں، اس لیے نوجوانوں کو خود انحصاری کی طرف لے جانے کے لیے ووکیشنل ٹریننگ اور جدید مہارتوں کی فراہمی ناگزیر ہے۔ انہوں نے کہا کہ حکومت کا مقصد نوجوانوں کو مارکیٹ سے ہم آہنگ اور بین الاقوامی معیار کی مہارتیں فراہم کرنا ہے تاکہ وہ ملکی اور عالمی سطح پر روزگار حاصل کر سکیں۔
انہوں نے ہدایت دی کہ بی ٹیوٹا کے تمام پروگراموں کو جدید تقاضوں کے مطابق ڈھالا جائے اور ٹیکنالوجی پر مبنی تربیتی نظام متعارف کرایا جائے تاکہ نوجوانوں کی استعداد کار میں اضافہ ہو۔
وزیراعلیٰ نے کہا کہ ادارہ جاتی اصلاحات کے ذریعے ٹریننگ اداروں کو ازسرنو منظم کیا جائے گا اور ماہرین کی مشاورت سے ایک جامع حکمت عملی تیار کی جائے گی تاکہ صوبے میں ہنر مندی کے فروغ کو یقینی بنایا جا سکے۔
انہوں نے زور دیا کہ بلوچستان کے نوجوانوں کو عالمی منڈی کی ضروریات کے مطابق مہارتیں فراہم کرنا وقت کی اہم ضرورت ہے اور اسی سمت میں حکومت عملی اقدامات کر رہی ہے۔