بلوچستان حکومت نے مالی سال 2026-27 کے لیے محکمہ مواصلات و تعمیرات (C&W) کی ترقیاتی اسکیموں کے تحت ٹینڈرنگ کے عمل کا باقاعدہ آغاز کر دیا ہے، جس کا مقصد صوبے بھر میں بنیادی ڈھانچے کے منصوبوں کی رفتار تیز کرنا اور انہیں بروقت مکمل کرنا ہے۔
حکومتی اعلامیے کے مطابق نئے مالی سال کے آغاز پر ہی ترقیاتی سرگرمیوں کا آغاز حکومت کی اس حکمت عملی کا حصہ ہے جس کے تحت سڑکوں، پلوں اور دیگر عوامی انفراسٹرکچر کے منصوبوں پر فوری عملدرآمد یقینی بنایا جائے گا۔ اس اقدام کو وزیراعلیٰ بلوچستان میر سرفراز بگٹی کی ہدایت اور صوبائی وزیر مواصلات و تعمیرات میر سلیم احمد کھوسہ اور سیکرٹری سی اینڈ ڈبلیو بابر خان کی نگرانی میں شروع کیا گیا ہے۔
محکمہ کے حکام کے مطابق گزشتہ دو مالی سالوں کے دوران ترقیاتی بجٹ کے بہتر استعمال کی بدولت صوبے میں ترقیاتی منصوبوں کی رفتار میں نمایاں بہتری آئی ہے۔ انہوں نے کہا کہ بہتر مالی نظم و نسق، مؤثر منصوبہ بندی اور بروقت عملدرآمد کے باعث فنڈز کا زیادہ مؤثر استعمال ممکن ہوا ہے، جس سے بنیادی ڈھانچے کی بہتری میں مدد ملی ہے۔
اعلامیے میں مزید کہا گیا ہے کہ پلاننگ کمیشن کے قواعد و ضوابط اور فنانشل مینوئل کے مطابق پاکستان میں مالی سال یکم جولائی سے 30 جون تک ہوتا ہے، اور ترقیاتی ذیلی کمیٹی (DSC) کی منظوری کے بعد یکم جولائی سے ہی مختلف منصوبوں کے ٹینڈرز قومی و علاقائی اخبارات میں شائع کیے جا رہے ہیں۔
سیکرٹری مواصلات و تعمیرات بابر خان نے کہا کہ مالی سال کے آغاز پر ہی ٹینڈرنگ کا عمل شروع کرنا حکومت کی شفافیت، عوامی وسائل کے مؤثر استعمال اور ترقیاتی منصوبوں کی بروقت تکمیل کے عزم کی عکاسی کرتا ہے۔ انہوں نے کہا کہ یہ پیش رفت نہ صرف منصوبوں کی رفتار تیز کرے گی بلکہ روزگار کے مواقع پیدا کرنے اور صوبے کی معاشی و سماجی ترقی میں بھی اہم کردار ادا کرے گی۔