وزیراعلیٰ بلوچستان سرفراز بگٹی نے کہا ہے کہ آزاد، ذمہ دار اور باخبر صحافت جمہوری معاشرے کے لیے ناگزیر ہے اور حکومت صحافیوں کو ہر ممکن تعاون فراہم کرتی رہے گی۔ انہوں نے یہ بات عالمی یومِ آزادی صحافت کے موقع پر اپنے بیان میں کہی۔
وزیراعلیٰ نے بلوچستان میں صحافیوں کو درپیش مشکل حالات کو تسلیم کرتے ہوئے کہا کہ صوبے میں میڈیا ورکرز انتہائی نامساعد حالات میں اپنی پیشہ ورانہ ذمہ داریاں انجام دے رہے ہیں۔ انہوں نے اپنی ذمہ داریاں نبھاتے ہوئے جان دینے والے 40 سے زائد صحافیوں کو خراج عقیدت پیش کیا۔
سرفراز بگٹی نے کہا کہ حکومت کوئٹہ میں سید محمد بلقی میڈیا اکیڈمی کو فعال بنانے کے لیے مکمل تعاون فراہم کرے گی تاکہ صحافی جدید تربیت، تحقیق اور بدلتے میڈیا رجحانات کے مطابق اپنی صلاحیتیں بہتر بنا سکیں۔
انہوں نے کہا کہ صحافی برادری کے مسائل حل کرنے کے لیے عملی اقدامات کیے جا رہے ہیں جن میں جرنلسٹس ویلفیئر انڈومنٹ فنڈ میں اضافہ شامل ہے تاکہ مشکل حالات میں صحافیوں اور ان کے خاندانوں کی مدد کی جا سکے۔
وزیراعلیٰ کے مطابق ہیلتھ انشورنس، مالی امداد اور ایمرجنسی سپورٹ کے نظام کو بھی بہتر بنایا جا رہا ہے جبکہ بلوچستان میں صحافیوں کے لیے پہلی ہاؤسنگ اسکیم کی منظوری دے دی گئی ہے جس پر تیزی سے کام جاری ہے۔
انہوں نے مزید کہا کہ صوبے کی پہلی ڈیجیٹل میڈیا پالیسی بھی منظور کر لی گئی ہے جس کا مقصد ڈیجیٹل پلیٹ فارمز کو منظم کرنا اور ذمہ دار میڈیا کو فروغ دینا ہے۔
سرفراز بگٹی نے کہا کہ حکومت آزادی صحافت کے تحفظ، صحافیوں کی سلامتی اور ان کی پیشہ ورانہ خودمختاری کے لیے پرعزم ہے تاکہ ایک مضبوط، متوازن اور ترقی یافتہ معاشرہ تشکیل دیا جا سکے۔