وفاقی حکومت نے بلوچستان میں فرنٹیئر کور (ایف سی) کے آپریشنل دائرہ کار کو مزید وسیع کرنے کا فیصلہ کرتے ہوئے نیا ہیڈکوارٹر “فرنٹیئر کور بلوچستان (ویسٹ)” قائم کرنے کی منظوری دے دی ہے۔
وزارت داخلہ کی جانب سے جاری نوٹیفکیشن کے مطابق یہ فیصلہ وفاقی کابینہ کے 25 اپریل کے اجلاس میں کیا گیا تھا، جس کے تحت بلوچستان میں سکیورٹی اور انتظامی امور کو بہتر بنانے کے لیے اضافی کمانڈ اسٹرکچر تشکیل دیا جا رہا ہے۔
نئے ہیڈکوارٹر کے قیام کا مقصد صوبے کے مغربی علاقوں میں سکیورٹی آپریشنز کو مزید مؤثر بنانا اور زمینی سطح پر فورس کی موجودگی کو مضبوط کرنا بتایا گیا ہے۔
حکومتی نوٹیفکیشن میں کہا گیا ہے کہ اس اقدام سے ایف سی کی تنظیمی صلاحیت میں اضافہ ہوگا اور سکیورٹی چیلنجز سے نمٹنے میں بہتری آئے گی۔
یہ فیصلہ ایسے وقت میں کیا گیا ہے جب بلوچستان میں امن و امان اور سکیورٹی صورتحال سے متعلق اقدامات پر وفاقی اور صوبائی سطح پر توجہ بڑھ رہی ہے۔
حکام کے مطابق نئے کمانڈ اسٹرکچر کے تحت فورس کی آپریشنل کوریج کو وسعت دی جائے گی تاکہ حساس علاقوں میں بروقت ردعمل اور بہتر کوآرڈینیشن ممکن ہو سکے۔