کوئٹہ: بلوچستان حکومت نے رخنی بازار کی ترقی اور خوبصورتی کے جامع منصوبے کی منظوری دے دی ہے۔
کابینہ کی منظوری کے بعد سروسز اینڈ جنرل ایڈمنسٹریشن ڈیپارٹمنٹ نے فوری عملدرآمد کے احکامات جاری کر دیے تاکہ عوام کو جلد فوائد حاصل ہو سکیں۔
وزیراعلیٰ میر سرفراز بگٹی نے کہا کہ منصوبہ مقامی معیشت کو تقویت دے گا، کاروباری مواقع بڑھائے گا اور تاجروں کو منظم و محفوظ ماحول فراہم کرے گا۔
انہوں نے کہا کہ اس منصوبے سے روزگار کے نئے مواقع پیدا ہوں گے جبکہ شہری سہولیات اور انفراسٹرکچر میں بھی بہتری آئے گی۔
حکام کے مطابق منصوبے کا مقصد تجارتی سرگرمیوں کو فروغ دینا، عوامی سہولیات بہتر بنانا اور علاقے کی مجموعی خوبصورتی و معیارِ زندگی کو بلند کرنا ہے۔
صوبائی حکومت نے اس اقدام کو پائیدار ترقی، بہتر شہری نظم و نسق اور جدید شہری منصوبہ بندی کی جانب اہم قدم قرار دیا ہے۔