اسلام آباد: سوشل میڈیا پر وائرل ہونے والی France 24 سے منسوب ویڈیو کو جعلی اور گمراہ کن قرار دے دیا گیا ہے، جس میں پاکستان مخالف مہم کا دعویٰ کیا گیا تھا۔
فیکٹ چیک رپورٹ کے مطابق مذکورہ ویڈیو میں یہ تاثر دیا گیا کہ ایران کے نام پر جعلی اکاؤنٹس پاکستان کے خلاف پروپیگنڈا کر رہے ہیں، تاہم ایسا کوئی پروگرام یا خبر فرانس 24 پر نشر نہیں ہوئی۔
تحقیقات میں سامنے آیا کہ ویڈیو دراصل فرانس 24 کے پروگرام “اسکوپ” کے 27 مارچ کے اصل کلپ سے لی گئی تھی، جس میں اسرائیل جنگ اور میڈیا پابندیوں پر بات کی گئی تھی، نہ کہ پاکستان سے متعلق کوئی رپورٹ شامل تھی۔
مزید تجزیے میں معلوم ہوا کہ وائرل ویڈیو کا آڈیو بھی اصل نہیں بلکہ مصنوعی ذہانت کے ذریعے تیار کیا گیا، جسے ایک ٹول نے ڈیپ فیک قرار دیتے ہوئے انتہائی کم صداقت اسکور دیا۔
فیکٹ چیک کے مطابق ویڈیو کو ایڈیٹنگ کے ذریعے تیار کیا گیا اور اس میں غیر متعلقہ مناظر کے ساتھ جعلی آڈیو شامل کر کے گمراہ کن بیانیہ پیش کیا گیا، جس کا حقیقت سے کوئی تعلق نہیں۔