بلوچستان کے ضلع کیچ میں اے این ایف کا انٹیلی جنس بیسڈ آپریشن، 3,825 کلوگرام منشیات برآمد

اینٹی نارکوٹکس فورس نے بلوچستان کے ضلع کیچ کے علاقے جوسک میں انٹیلی جنس بیسڈ آپریشن کے دوران 3,825 کلوگرام منشیات برآمد کرلی۔ اے این ایف ترجمان کے مطابق خفیہ اطلاعات کی بنیاد پر مشتبہ ٹھکانے پر کارروائی کی گئی، جہاں منشیات اسمگلنگ کے ایک نیٹ ورک کی موجودگی کی اطلاع تھی۔ برآمد ہونے والی منشیات میں 2,454 کلوگرام چرس، 1,363 کلوگرام میتھ ایمفیٹامین یعنی آئس اور 8 کلوگرام ہیروئن شامل ہے، جن کی مجموعی مالیت 560 ملین روپے سے زائد بتائی گئی ہے۔ اے این ایف کے مطابق یہ منشیات افغانستان سے پاکستان اسمگل کرکے ایک کمپاؤنڈ میں عارضی طور پر ذخیرہ کی گئی تھیں، جنہیں بعد ازاں سمندری راستے کے ذریعے بیرون ملک منتقل کیا جانا تھا۔ فورس کے مطابق اسمگلنگ نیٹ ورک کی جانب سے سگنل موصول ہونے کے بعد منشیات کی بیرون ملک ترسیل کی جانی تھی، تاہم کارروائی کے دوران اسے قبضے میں لے لیا گیا۔ برآمدگی کے بعد اے این ایف نے مبینہ بین الاقوامی منشیات اسمگلنگ نیٹ ورک کے ارکان اور ان کے سہولت کاروں کی شناخت اور گرفتاری کیلئے کارروائیاں شروع کردی ہیں۔ ترجمان نے بتایا کہ ملوث افراد کی گرفتاری کیلئے آپریشن جاری ہے۔ اے این ایف کے مطابق ماضی میں بھی افغانستان سے پاکستان اور بعد ازاں دیگر ممالک کو بڑی مقدار میں منشیات اسمگل کرنے کی متعدد کوششیں ناکام بنائی گئی ہیں، جبکہ حالیہ کارروائی بین الاقوامی اسمگلنگ نیٹ ورکس کے خلاف جاری اقدامات کا حصہ ہے