کوئٹہ، پاکستان میں وزیراعلیٰ بلوچستان سرفراز بگٹی نے کہا ہے کہ وکلاء کو بہتر سہولیات فراہم کرنے سے عدالتی نظام زیادہ مؤثر اور مضبوط بنایا جا سکتا ہے۔
تفصیلات کے مطابق انہوں نے یہ بات کوئٹہ میں پاکستان بار کونسل اور بلوچستان بار کونسل کے مشترکہ وفد سے ملاقات کے دوران کہی، جہاں وکلاء کے مسائل اور فلاحی اقدامات پر تفصیلی غور کیا گیا۔
اجلاس میں وکلاء کے لیے طبی سہولیات، سبسڈی پر چیمبرز، ٹرانسپورٹ، ڈیجیٹل لائبریری اور ہاؤسنگ اسکیم سمیت مختلف منصوبوں پر بریفنگ دی گئی۔
وزیراعلیٰ نے کہا کہ صوبائی حکومت وکلاء کی فلاح و بہبود کو اولین ترجیح دے رہی ہے اور ان کے مسائل حل کرنے کے لیے عملی اقدامات کیے جا رہے ہیں۔
انہوں نے مزید کہا کہ بہتر سہولیات وکلاء کی کارکردگی کو بہتر بنانے کے ساتھ ساتھ پورے نظامِ انصاف کی مضبوطی میں بھی اہم کردار ادا کریں گی۔