پاکستان، سعودی عرب اور ترکیہ کے درمیان مشترکہ دفاعی معاہدے کا پہلا اجلاس آج استنبول میں ہوگا

پاکستان، سعودی عرب اور ترکیہ کے درمیان مکہ مشترکہ دفاعی معاہدے کے تحت پہلا اجلاس آج استنبول میں منعقد ہوگا، جس میں معاہدے کے مختلف پہلوؤں اور اب تک ہونے والی پیش رفت کا جائزہ لیا جائے گا۔ وزیراعظم آفس کے مطابق تینوں ممالک کے نمائندے رواں ماہ معاہدے پر دستخط کے بعد پہلی مرتبہ باضابطہ مذاکرات کریں گے اور باہمی دفاعی تعاون کو مزید مؤثر بنانے کے امور پر تفصیلی تبادلہ خیال کریں گے۔ اجلاس میں معاہدے کے دائرہ کار، تعاون کے طریقہ کار اور آئندہ پیش رفت سے متعلق معاملات زیر غور آئیں گے۔ پاک فوج کے شعبہ تعلقات عامہ کے مطابق چیف آف ڈیفنس فورسز اور چیف آف آرمی اسٹاف فیلڈ مارشل عاصم منیر سرکاری دورے پر ترکیہ پہنچ گئے ہیں۔ نائب وزیراعظم اور وزیر خارجہ اسحاق ڈار بھی ترکیہ میں موجود ہیں۔ توقع ہے کہ اجلاس کے دوران تینوں ممالک علاقائی سلامتی اور مشترکہ دفاعی تعاون کے حوالے سے اپنے مؤقف اور ترجیحات پر بھی گفتگو کریں گے۔ پاکستان، سعودی عرب اور ترکیہ کے درمیان حالیہ دفاعی معاہدے کو باہمی تعاون کے فروغ کی ایک اہم پیش رفت قرار دیا جا رہا ہے، جبکہ استنبول میں ہونے والا یہ اجلاس معاہدے پر عملی پیش رفت کے لیے اہم سمجھا جا رہا ہے۔