سیکیورٹیز اینڈ ایکسچینج کمیشن آف پاکستان (ایس ای سی پی) نے مالی سال 2025-26 کے دوران 14ویں ابتدائی عوامی پیشکش (IPO) کی منظوری دے دی ہے، جسے ملک کی کیپیٹل مارکیٹس میں بڑھتی ہوئی سرمایہ کاری اور سرگرمیوں کی علامت قرار دیا جا رہا ہے۔ منظور شدہ آئی پی او “ایل ایس ای SPAC-II” کا ہے، جو ایک اسپیشل پرپز ایکوزیشن کمپنی ہے اور مستقبل میں کسی کمپنی کے انضمام یا خریداری کے لیے سرمایہ جمع کرے گی۔
ایس ای سی پی کے مطابق اس آئی پی او کے تحت 20 ملین شیئرز عوام کے لیے پیش کیے جائیں گے جن میں 18 ملین شیئرز ادارہ جاتی سرمایہ کاروں اور 2 ملین شیئرز ریٹیل سرمایہ کاروں کے لیے مختص کیے گئے ہیں۔ شیئر کی قیمت 10 روپے مقرر کی گئی ہے جبکہ حاصل ہونے والی رقم مستقبل میں مناسب سرمایہ کاری یا خریداری کے مواقع کے لیے استعمال کی جائے گی۔
ریگولیٹر کے مطابق حالیہ اصلاحات کے باعث پاکستان میں آئی پی او مارکیٹ کی سرگرمیوں میں اضافہ ہوا ہے اور سرمایہ کاروں کے لیے نئے مواقع پیدا ہو رہے ہیں۔ ایس ای سی پی نے کہا کہ یہ اقدام نہ صرف مارکیٹ کی گہرائی میں اضافہ کرے گا بلکہ نئے مالیاتی آلات اور سرمایہ کاری کے رجحانات کو بھی فروغ دے گا۔
حکام کا کہنا ہے کہ پاکستان میں کیپیٹل مارکیٹس کو جدید بنانے، ڈیجیٹلائزیشن بڑھانے اور کمپنیوں کے لیے فنانسنگ کے عمل کو آسان بنانے کے اقدامات کے نتیجے میں اسٹاک مارکیٹ میں مثبت رجحان دیکھنے میں آ رہا ہے۔