کوئٹہ، پاکستان میں وزیراعلیٰ بلوچستان سرفراز بگٹی نے کہا ہے کہ وکلاء کو بہتر سہولیات کی فراہمی سے عدالتی نظام زیادہ مؤثر اور مضبوط بنایا جا سکتا ہے۔
تفصیلات کے مطابق انہوں نے یہ بات کوئٹہ میں پاکستان بار کونسل اور بلوچستان بار کونسل کے مشترکہ وفد سے ملاقات کے دوران کہی، جہاں وکلاء کے مسائل اور فلاحی اقدامات پر تفصیلی غور کیا گیا۔
اجلاس میں وکلاء کے لیے صحت کی سہولیات، سبسڈی پر چیمبرز، ٹرانسپورٹ کی سہولت، ڈیجیٹل لائبریری اور وکلاء ویلفیئر ہاؤسنگ اسکیم سمیت مختلف منصوبوں پر بریفنگ دی گئی۔
وزیراعلیٰ نے کہا کہ صوبائی حکومت وکلاء کی فلاح و بہبود کو ترجیح دے رہی ہے اور ان کے مسائل حل کرنے کے لیے عملی اقدامات کیے جا رہے ہیں۔
انہوں نے مزید کہا کہ وکلاء کو بہتر سہولیات فراہم کرنے سے نہ صرف ان کا معیارِ زندگی بہتر ہوگا بلکہ پورے عدالتی نظام کی کارکردگی بھی بہتر ہو گی۔