وزیراعلیٰ بلوچستان میر سرفراز بگٹی نے ضلع موسیٰ خیل کی تحصیل کنگری میں حالیہ زلزلے سے متاثرہ خاندانوں کی ہر ممکن مدد جاری رکھنے کے عزم کا اعادہ کرتے ہوئے کہا ہے کہ متاثرین کی امداد، بحالی اور شفاف انداز میں ریلیف کی فراہمی صوبائی حکومت کی اولین ترجیح ہے۔
سوشل میڈیا پر جاری اپنے بیان میں وزیراعلیٰ نے کہا کہ حکومت زلزلہ متاثرین کو درپیش مشکلات سے پوری طرح آگاہ ہے اور معمولات زندگی کی بحالی تک ان کے ساتھ کھڑی رہے گی۔ انہوں نے بتایا کہ ان کی ہدایت پر ریلیف کمشنر اور ڈائریکٹر جنرل پی ڈی ایم اے نے متاثرہ علاقوں کا دورہ کرکے نقصانات کا جائزہ لیا اور امدادی سامان کی تقسیم کی نگرانی کی۔
وزیراعلیٰ بگٹی نے ضلعی انتظامیہ، پی ڈی ایم اے اور متعلقہ اداروں کو ہدایت کی کہ امدادی سرگرمیوں میں مزید تیزی لائی جائے اور ہر مستحق خاندان تک شفاف، بروقت اور بلاامتیاز امداد پہنچائی جائے۔ انہوں نے نقصانات کا جلد اور جامع تخمینہ لگانے، مسلسل صورتحال کی نگرانی برقرار رکھنے اور متاثرہ علاقوں میں بحالی و تعمیر نو کے عمل کو ترجیحی بنیادوں پر مکمل کرنے کی بھی ہدایت کی۔