کوئٹہ: وزیراعلیٰ بلوچستان میر سرفراز بگٹی نے صوبائی اسمبلی کے بجٹ اجلاس کے اختتامی خطاب میں کہا ہے کہ بلوچستان پہلے ہی ایک روشن مستقبل کی طرف پرواز کر چکا ہے اور صوبے میں جاری اصلاحات، میرٹ، گڈ گورننس اور استحکام کا سفر اب کوئی نہیں روک سکتا۔ ان کے مطابق حکومت نے صوبے کو ترقی اور استحکام کی نئی سمت میں ڈال دیا ہے جس کے ثمرات جلد عوام تک پہنچیں گے۔
وزیراعلیٰ نے کہا کہ ریاست اُن سیاسی قوتوں سے بات چیت کے لیے تیار ہے جو آئین کو تسلیم کرتی ہیں، تاہم دہشت گرد تنظیموں کے ساتھ کسی قسم کے مذاکرات ممکن نہیں۔ انہوں نے واضح کیا کہ حکومت نے دہشت گردی کے خلاف جنگ کو اپنی پالیسی کا بنیادی حصہ بنا لیا ہے اور اس کے لیے عسکری کارروائی کے ساتھ ساتھ انتظامی اور اصلاحاتی اقدامات بھی کیے جا رہے ہیں۔
سرفراز بگٹی نے الزام عائد کیا کہ بعض غیر ملکی عناصر دہشت گرد تنظیموں کی معاونت کر رہے ہیں اور اگر یہ بیرونی حمایت ختم ہو جائے تو یہ عناصر جلد ختم ہو جائیں گے۔ انہوں نے کہا کہ صوبائی حکومت نے ریاست اور عوام کے درمیان اعتماد بحال کرنے کے لیے گورننس اصلاحات پر بھی خصوصی توجہ دی ہے۔
وزیراعلیٰ نے اپنے خطاب میں اس عزم کا اعادہ کیا کہ بلوچستان میں امن، ترقی اور استحکام کا سفر جاری رہے گا اور حکومت کسی بھی رکاوٹ کے باوجود اپنے اصلاحاتی ایجنڈے سے پیچھے نہیں ہٹے گی۔