اسلام آباد، 14 اپریل (ویب ڈیسک): چین نے پاکستان کی علاقائی امن و استحکام کے لیے جاری سفارتی کوششوں کی حمایت کا اظہار کیا ہے، وزارتِ خارجہ کے مطابق چین کے وزیر خارجہ وانگ یی اور نائب وزیراعظم و وزیر خارجہ اسحاق ڈار کے درمیان ٹیلیفونک رابطہ ہوا۔
تفصیلات کے مطابق گفتگو کے دوران فریقین نے اسلام آباد میں حال ہی میں مکمل ہونے والے امریکہ اور ایران کے مذاکرات کا جائزہ لیا۔ چینی وزیر خارجہ نے پاکستان کی جانب سے خطے میں امن کے لیے ادا کیے گئے کردار کو سراہتے ہوئے اس کی مسلسل حمایت کا اعادہ کیا۔
وزارتِ خارجہ کے مطابق اسحاق ڈار نے بھی پاکستان کے اس مؤقف کو دہرایا کہ خطے میں مسائل کے حل کے لیے مذاکرات اور سفارت کاری ہی واحد مؤثر راستہ ہیں۔
دونوں رہنماؤں نے پاکستان-چین پانچ نکاتی امن اقدام پر بھی تبادلہ خیال کیا اور اس بات پر اتفاق کیا کہ خطے میں پائیدار امن کے لیے بات چیت اور سفارت کاری ناگزیر ہے۔