پاکستان اور چین کے سرمایہ کاروں کے مشترکہ منصوبے شاہزاد اینڈ شاؤ فارم کا سنگِ بنیاد گوادر فری زون میں رکھ دیا گیا۔ اس منصوبے کا مقصد مقامی زرعی پیداوار، پراسیسنگ اور برآمدات کو فروغ دینا اور دونوں ممالک کے درمیان اقتصادی تعاون کو مزید مستحکم بنانا ہے۔
روزنامہ انڈیپنڈنٹ کے مطابق افتتاحی تقریب میں سیکریٹری میری ٹائم افیئرز کیپٹن (ر) محمد خرم آغا، چیئرمین گوادر پورٹ اتھارٹی نورالحق بلوچ، سرکاری حکام اور چینی سرمایہ کاروں نے شرکت کی۔
کیپٹن (ر) محمد خرم آغا نے کہا کہ مشترکہ سرمایہ کاری سے مقامی نوجوانوں کے لیے روزگار اور فنی تربیت کے نئے مواقع پیدا ہوں گے۔ ان کے مطابق زراعت اور غذائی مصنوعات کے شعبوں میں سرمایہ کاری مقامی وسائل کو عالمی منڈیوں سے منسلک کرنے میں مدد دے سکتی ہے۔
چیئرمین گوادر پورٹ اتھارٹی نورالحق بلوچ نے کہا کہ گوادر فری زون میں صنعتی سرگرمیوں کے فروغ سے بین الاقوامی منڈیوں تک رسائی کے نئے مواقع پیدا ہوں گے۔ انہوں نے بلوچستان کے زراعت، ماہی گیری اور لائیوسٹاک کے شعبوں میں سرمایہ کاری کی صلاحیت کو اجاگر کیا۔ ان کا کہنا تھا کہ کیچ اور پنجگور کی کھجوروں سمیت مقامی مصنوعات کی پراسیسنگ اور برآمدات اقتصادی ترقی میں اہم کردار ادا کر سکتی ہیں۔
کمپنی کے چیف ایگزیکٹو آفیسر شاؤ یونفی نے توقع ظاہر کی کہ یہ منصوبہ مقامی روزگار میں اضافے اور چین کی غذائی ضروریات پوری کرنے میں معاون ثابت ہوگا۔
منصوبے سے گوادر فری زون میں کاروباری سرگرمیوں، مقامی پیداوار کی برآمدات اور پاک چین اقتصادی تعاون کو فروغ ملنے کی توقع ہے۔