وفاقی حکومت نے ملکی اور غیر ملکی طویل مدتی سرمایہ کاری کو راغب کرنے کے لیے نجی سرمایہ کاری کا قومی پالیسی فریم ورک تیار کرنے پر کام تیز کردیا ہے۔ وزیر خزانہ سینیٹر محمد اورنگزیب کی زیر صدارت کمیٹی کے دوسرے اجلاس میں مجوزہ فریم ورک پر پیش رفت کا جائزہ لیا گیا۔ اجلاس میں ضابطہ جاتی اصلاحات، ٹیکس نظام، ادارہ جاتی سرمایہ کاری، سرمایہ جاتی منافع، سرمایہ کی واپسی اور سرمایہ کاری سے اخراج کے طریقہ کار پر غور کیا گیا۔ حکومت کا مقصد نجی سرمایہ کاری کے شعبے کو مضبوط بنانا اور طویل مدتی سرمایہ کو کاروباری اور پیداواری شعبوں تک پہنچانا ہے۔ کمیٹی نے بینکوں، ترقیاتی مالیاتی اداروں، بیمہ کمپنیوں اور پنشن فنڈز کی نجی سرمایہ کاری میں شرکت آسان بنانے کے اقدامات کا جائزہ لیا، جبکہ محتاط مالی اور حساباتی تقاضوں برقرار رکھنے پر بھی زور دیا گیا۔ ٹیکس کے معاملے میں نجی سرمایہ کاری کے ڈھانچے کے لیے ٹیکس غیر جانب داری کے اصول پر غور کیا گیا تاکہ اضافی ٹیکس بوجھ پیدا نہ ہو۔ ساتھ ہی ٹیکس چوری، مصنوعی منافع، غلط قدر بندی اور دیگر ممکنہ غلط استعمال کی روک تھام کے لیے شفافیت، رجسٹریشن اور نگرانی کے اقدامات شامل کیے جائیں گے۔ حکومت ملکی سرمایہ کاری کے فروغ اور عالمی ادارہ جاتی سرمایہ کو پاکستان سے جوڑنے کے لیے قانونی اور انتظامی اصلاحات بھی آگے بڑھا رہی ہے
27°C
Sunny