بلوچستان کے وزیراعلیٰ کے مشیر برائے داخلہ امور بابر یوسفزئی نے گوادر میں ڈور چوک کے قریب مشترکہ آپریشن کے دوران دو مشتبہ دہشت گردوں کی گرفتاری پر پولیس اور دیگر قانون نافذ کرنے والے اداروں کو خراج تحسین پیش کیا ہے۔
انہوں نے کہا کہ یہ کامیاب کارروائی سیکیورٹی فورسز کی پیشہ ورانہ مہارت، چوکسی اور فوری ردعمل کی واضح مثال ہے۔ ان کے مطابق مشتبہ افراد کو اس وقت گرفتار کیا گیا جب انہوں نے پولیس موبائل پر حملے کے بعد فرار ہونے کی کوشش کی، تاہم سیکیورٹی اہلکاروں نے بروقت کارروائی کرتے ہوئے انہیں حراست میں لے لیا۔
بابر یوسفزئی نے کہا کہ اس نوعیت کی کارروائیاں صوبے میں ریاستی رٹ کو مزید مضبوط بناتی ہیں اور امن و امان کے قیام میں اہم کردار ادا کرتی ہیں۔ انہوں نے کہا کہ قانون نافذ کرنے والے اداروں کی بروقت کارروائی بہادری اور پیشہ ورانہ صلاحیت کا مظہر ہے۔
انہوں نے اس امید کا اظہار کیا کہ جاری تفتیش سے اہم شواہد اور معلومات سامنے آئیں گی، جن کی مدد سے مبینہ نیٹ ورکس اور سہولت کاروں کی نشاندہی ممکن ہوگی۔
مشیر داخلہ نے کہا کہ بلوچستان بھر میں دہشت گرد عناصر کے خلاف انٹیلی جنس بیسڈ آپریشنز جاری رہنے چاہئیں اور ایسے عناصر کے ساتھ کسی قسم کی نرمی نہیں برتی جائے گی۔
انہوں نے کہا کہ گوادر میں کامیاب کارروائی نے واضح پیغام دیا ہے کہ پولیس اور سیکیورٹی ادارے عوام کے جان و مال کے تحفظ اور دہشت گردی کے خطرات سے نمٹنے کے لیے مکمل طور پر تیار ہیں۔
