اسلام آباد: وزیراعلیٰ بلوچستان میر سرفراز بگٹی نے نیشنل ڈیٹابیس اینڈ رجسٹریشن اتھارٹی (نادرا) کے ہیڈکوارٹر کا دورہ کیا، جہاں انہیں رجسٹریشن اور تصدیقی خدمات پر تفصیلی بریفنگ دی گئی۔
دورے کے دوران وزیراعلیٰ نے نادرا کی کارکردگی کو سراہتے ہوئے کہا کہ ادارے نے شہریوں کی شناخت اور ڈیٹا مینجمنٹ کے نظام کو بہتر بنانے میں اہم کردار ادا کیا ہے۔
انہوں نے خاص طور پر موبائل وین سروس کو سراہا اور ہدایت کی کہ دور دراز اور پسماندہ علاقوں میں رجسٹریشن سہولیات کو مزید مؤثر بنانے کیلئے اس سروس کو مزید وسعت دی جائے۔
وزیراعلیٰ بلوچستان نے یقین دہانی کرائی کہ صوبائی حکومت نئے نادرا مراکز کے قیام میں مکمل تعاون فراہم کرے گی تاکہ عوام کو شناختی دستاویزات کے حصول میں آسانی ہو۔
انہوں نے کہا کہ جدید ڈیجیٹل نظام کے ذریعے عوامی خدمات کی فراہمی میں شفافیت اور رفتار میں اضافہ ہو رہا ہے، جو کہ خوش آئند پیش رفت ہے۔